როგორ ჩავატაროთ შიდა სასკოლო ღონისძიება ხარისხიანად?

გზამკვლევი ორგანიზატორისთვის ტვინების ბრძოლის შიდა სასკოლო პირველობის ჩასატარებლად.

ტვინების ბრძოლის შემოდგომის სეზონი დაიწყო, რაც იმას ნიშნავს, რომ ასობით სკოლაში უახლოესი კვირების განმავლობაში შიდა-სასკოლო ტურის ფაციფუცი დატრიალდება <3

ერთი შეხედვით, ეს პროცესი ცოტა დამაბნევლად შეიძლება გამოიყურებოდეს, რადგან ორგანიზატორის გონებაში უამრავი კითხვა იბადება იმაზე თუ როგორ დაგეგმოს თამაშის დღე. სწორედ ამ კითხვებზე საპასუხოდ, წინამდებარე სტატიაში თავი მოვუყარეთ პროცედურების ნაბიჯ-ნაბიჯ აღწერილობას, ჩვენს გამოცდილებას და რჩევებს, რათა თქვენი საქმე გავამარტივოთ, პროცესი კი ყველასთვის მაქსიმალურად სასიამოვნო გავხადოთ.

აბა, მზად ხართ სკოლის ერთი რიგითი დღე ქაოტური თავყრილობიდან დაუვიწყარ ინტელექტუალურ ფესტივალად აქციოთ? თუ თქვენი პასუხია "დიახ!", განაგრძეთ კითხვა.

დავიწყოთ "ანბანით" ანუ გავარკვიოთ/გავიხსენოთ ტვინების ბრძოლის ასაკობრივი კატეგორიები. ჩვენს თამაშში მონაწილე მოსწავლეები სამ დიდ ჯგუფად არიან დაყოფილი:

• U5 - მე-3, მე-4, მე-5 კლასები

• U8 - მე-6, მე-7, მე-8 კლასები

• U12 - მე-9, მე-10, მე-11, მე-12 კლასები

  
  

ხშირად დაშვებული შეცდომების სტატისტიკა მოითხოვს, რომ აქვე განვმარტოთ შემდეგი რამდენიმე წესი: 

• თითოეულ კატეგორიაში მოასპარაზე გუნდები კომპლექტდებიან არა აუცილებლად კლასის მიხედვით, მაგ: მხოლოდ V კლასელები ერთ გუნდში, არამედ ამ კატეგორიაში შემავალი ნებისმიერი კლასის მოსწავლეებით, მაგ: U5 კატეგორიაში მოთამაშე ერთი გუნდი შესაძლოა აერთიანებდეს III , IV და V კლასის მოსწავლეებს;

• კლასი არ არის შეზღუდული მხოლოდ ერთი გუნდის დაკომპლექტებით. თითოეული კლასი შექმნის იმდენ დამოუკიდებელ გუნდს, რამდენის შექმნის სურვილი და შესაძლებლობა ექნება.

  
  

გუნდში არის 5 ძირითადი მოთამაშე.  ტვინების ბრძოლის ფორმატი ითვალისწინებს სათადარიგო ანუ 6-ე წევრის ჩართვას პროცესში სხვა წევრის ჩანაცვლების გზით. ამგვარად, მთელი თამაშის მანძილზე, სათამაშო მაგიდასთან გუნდი წარმოდგენილია არა უმეტეს 5 წევრით. სათადარიგო მოთამაშის დამატების საჭიროების გამოკვეთა, ისევე როგორც მისი ჩართვა უშუალო თამაშში სრულად გუნდის გადაწყვეტილებაზეა დამოკიდებული. სათადარიგო წევრის თამაშში შემოყვანა ხდება გუნდის მოთხოვნის საფუძველზე, კაპიტნების რაუნდის შემდეგ.

ვინ ატარებს ტვინების ბრძოლის თამაშებს?

რაკი ამ ტექსტს კითხულობთ, სავარაუდოა რომ სწორედ ის ადამიანი ხართ, ვინც ტვინების ბრძოლის ჩატარებას გეგმავს. თქვენს გარეშე (თითქმის) არაფერი გამოვა! მონაწილეების ინფორმირება, სათამაშო სივრცის მოწყობა და ასპარეზობის ჩატარება - ესენია ორგანიზატორის მთავარი ფუნქციები, რომელთა შესრულება შეუძლია როგორც სკოლის ადმინისტრაციის წარმომადგენელს, ისე პედაგოგს ან სულაც მოსწავლეთა თვითმმართველობის გუნდს.

ტრადიციულად, ყოველი ახალი სეზონის დასაწყისში ტვინების ბრძოლა სკოლაში აგზავნის პაკეტს, რომელშიც შედის თამაშის ჩასატარებლად საჭირო ყველა მასალა და ესენია (თითოეულის გასახსნელად დააწექით დოკუმენტის სათაურს):

• სარეგისტრაციო ფორმა

• პასუხების ფურცელი

• შედეგების ცხრილი

რაც შეეხება შეკითხვათა პაკეტს, ის მოგეწოდებათ უშუალოდ თამაშის ჩატარების დღეს. თითოეულ თამაშზე ჟღერდება 15 მრავალფეროვანი კითხვა. ქულები კითხვის სირთულის მიხედვით არის: 5 ქულიანი (მარტივი), 6 ქულიანი (საშუალო) და 7 ქულიანი (რთული).

დირექციასთან თამაშის დღის შეთანხმების და მოსწავლეების ინფორმირების შემდეგი ამოცანა სასკოლო ტურის ხარისხიანი ჩატარებისთვის ასისტენტების მოძიებაა. შედარებით მრავალგუნდიან თამაშს 3 ადამიანისგან შემდგარი საორგანიზაციო გუნდი სჭირდება, რომელშიც შედის:

1. წამყვანი (ხშირად, ამ როლს თავად ორგანიზატორი ითავსებს): არის ქარიზმატული ლიდერი, რომელიც თამაშს ცეცხლს შეუნთებს.

2. კომისარი: პასუხისმგებელია შედეგების ცხრილში ქულების შეყვანასა და სამართლიან დათვლაზე.

3. იფრინდი (ასისტენტი): პასუხების ფურცლების სწრაფი და მოწესრიგებული შეგროვება მისი საქმეა.

   
   

რა უნდა გააკეთოთ უშუალოდ თამაშის დღეს?

• თითოეულ გუნდს დაახვედრეთ სარეგისტრაციო ფორმა, კალამი და პასუხების ფურცლები.

• თამაშის დაწყებამდე სთხოვეთ კაპიტნებს წინასწარ დააწერონ გუნდის სახელი და კითხვის ნომერი ყველა პასუხის ფურცელს. ეს დაგიზოგავთ დროს და აგარიდებთ ქაოსს.

• ყოველი მომდევნო შეკითხვა გააჟღერეთ დაუყოვნებლივ! არ დაელოდოთ ქულების ცხრილში შეტანას.

• გააფრთხილეთ გუნდები, რომ პასუხის ადრე ჩაბარებას არავითარი უპირატესობა არ აქვს. ფურცლების აკრება დაიწყეთ მოსაფიქრებელი დროის ბოლო 15 წამის განმავლობაში. მკაფიოდ გააჟღერეთ, რომ: ყველა კაპიტანს ევალება 90 წამის დასრულებამდე პასუხების ფურცელი აღმართული ჰქონდეს. იმ შემთხვევაში თუ კაპიტანი ფურცელს დროის სრულად ამოწურვის შემდეგ აღმართავს, წამყვანი იბარებს ფურცელს, თუმცა აღნიშნულ პასუხს ბათილად სცნობს. 

• შეახსენეთ გუნდებს, რომ პასუხის არქონის შემთხვევაში ისინი ვალდებული არიან ცარიელი ფურცელი ჩააბარონ იფრინდებს.

• დასაწყისშივე შეახსენეთ გუნდებს, რომ მე-8 კითხვა არის „კაპიტნის დრო“! ამ რაუნდზე მაგიდასთან რჩება მხოლოდ გუნდის კაპიტანი ან გუნდის გადაწყვეტილებით ნებისმიერი ერთი მონაწილე.

• გადაიღეთ ასპარეზობის ამსახველი დინამიური, ემოციური ან/და სახალისო ფოტოები. თქვენი კადრები შიდა-სასკოლო თამაშების რუბრიკის მომზადებაში და თქვენი მოსწავლეების ემოციების გაზიარებაში დაგვეხმარება.

  
  

თამაშის დასასრულს, იმარჯვებს გუნდი, რომელიც ყველაზე მეტ ქულას აგროვებს!

ამ ყველაზე საპასუხისმგებლო და ამავე დროს სასიამოვნო ეტაპის უკან მოტოვების შემდეგ, რჩება ნაკლებად შემოქმედებითი, თუმცა ძააალიან მნიშვნელოვანი რამდენიმე ნაბიჯი - თამაშის დღის მასალების გადმოგზავნა ქალაქის მენეჯერთან, რომელიც არის ჩვენი გუნდის წარმომადგენელი თქვენს ქალაქში. (ან დაგვიკავშირდით https://www.brains.ge/contact-ზე მითითებული საკონტაქტო არხებით) 

რას გვიგზავნით?

• 📊 შედეგების შევსებულ ცხრილს

• 📝 გუნდების სარეგისტრაციო ფორმებს

• 📸 საუკეთესო ფოტოებს (ემოციური და დინამიკური კადრები თამაშიდან)

• ✍️ მოკლე ისტორია (სურვილისამებრ): მოგვიყევით თამაშის ყველაზე საინტერესო მომენტის შესახებ. მაგალითად, თამაშის მიმდინარეობის სახალისო, გარდამტეხი ან მოულოდნელი მომენტები; მეგობრების მიერ გუნდის მხარდაჭერის ისტორიები; სწორი პასუხების რეკორდული მაჩვენებლები; ყველაზე მეტი სწორი პასუხის ავტორები და მათი კომენტარები იმაზე თუ როგორ ემზადებიან თამაშებისთვის; და სხვა ისეთი ისტორია, რომლებიც ტვინების ბრძოლის თამაშის სულისკვეთებას გადმოცემს.

• რატომ არის ეს მნიშვნელოვანი? ჩვენი მედია გუნდი თქვენს მიერ მოწოდებულ მასალებზე დაყრდნობით მოამზადებს სტატიას თქვენი სკოლის წარმატებაზე და გააზიარებს წამყვან საგანმანათლებლო პლატფორმებზე!

  
  

სულ ესაა! 

რადგან ეს ინსტრუქცია ბოლომდე ჩაიკითხეთ, ეს იგი დაინტერესდით ^_^ და თუ ასეა, გეპატიჟებით ტვინების ბრძოლის დიდ გუნდში, რომელიც ცოდნის გარშემო აერთიანებს ასობით სკოლას და ათასობით მოსწავლეს!

სწორედ თქვენი უშუალო ძალისხმევით თქვენი სკოლა გახდება დიდი ინტელექტუალური ოჯახის წევრი და ჩვენი მოკავშირე ცოდნის გავრცელებაში. 

მაშ, რაღას ელით?